சரத்குமார் = Common sense

நடிகர் மற்றும் அரசியல் கட்சித் தலைவர்(!) சரத்குமார் நேற்று ஒரு பேட்டியில் முதல்வர் கருணாநிதி ராமரை அவதூறு பேசியதற்கு மன்னிப்பு கோர வேண்டும் அல்லது ராமரை வழிபடும் பக்தர்கள் இனி திமுக வுக்கு வாக்களிக்க வேண்டாம் என்று உறுதிபடக் கூற வேண்டும் என்று ஒரு சூப்பர் ஷாட் அடித்திருப்பது குறிப்பிடத்தக்கது!

மேலும் அவர், "பல கோடி பக்தர்களின் மனதை புண்படுத்தி விட்டு, பின் அவர்களிடமே தேர்தலின்போது வாக்குக்கு கையேந்துவது சரியல்ல! மக்களிடையே பிரிவினையை ஏற்படுத்தும் வகையில் ராமர் குறித்து முதல்வர் கூறிய சர்ச்சைக்குரிய கருத்துக்களால், அவர் IPC பிரிவு 295A மற்றும் 290 வாயிலாக தண்டனை பெற வாய்ப்புள்ளது. அத்வானியுடன் ராமர் குறித்த விவாதத்திற்குத் தயார் என்று அறைகூவல் விடும் முதல்வர் முதலில் தனது பதவியை ராஜினாமா செய்தால் தான், நியாயமான விவாதம் நடைபெற வழி பிறக்கும்! நம் மாநிலத்தை முன்னேற்றப் பாதையில் இட்டுச் செல்வதில் கவனம் செலுத்துவதை விடுத்து, இது போன்று உள்நோக்கத்துடனான, தேவையற்ற, பெரும்பான்மை இந்து மக்களை வேதனைக்குள்ளாக்கும் கருத்துக்களை பேசி, முதல்வர் தனது நேரத்தை வீணடித்துக் கொண்டிருக்கிறார்." என்று சரத் மேலும் கூறியுள்ளார்.

சேது சமுத்திரத் திட்டத்திற்கு மாற்றுப்பாதை அமைக்க முடியுமானால், அது குறித்து ஆராய்வதில் தவறொன்றுமில்லை என்றும், பொருளாதாரம் மற்றும் சுற்றுச்சூழல் ஆகிய அளவுகோல்களில், ராமர் சேதுவை உடைத்து அமைக்கும் கடல் பாதை தான் ஏற்றது என்ற வாதத்திற்கு வலு சேர்க்கும் கருத்துக்களை முன் வைக்க வேண்டியது அரசின் கடமை என்றும் சரத் கூறியுள்ளார்.

சரத் தனது பேட்டியில் பிஜேபியையும் ஒரு வாங்கு வாங்கியுள்ளார்! திட்டம் தொடங்கி 18 மாதங்களுக்குப் பின் அரசியல் ஆதாயத்திற்காக, பிஜேபி இப்பிரச்சினையை கையில் எடுத்திருப்பதாக அவர் குற்றம் சாட்டினார்! பிஜேபி விரித்த வலையில் தி.மு.க விழுந்து விட்டது என்றும், திரு.அத்வானி மற்றும் திரு.கருணாநிதி ஆகிய இருவருமே கண்டனத்துக்குரியவர்கள் என்றும் சரத் பொரிந்துள்ளார்.

தமிழர்களின் 150 ஆண்டுக் கனவான சேது சமுத்திரத் திட்டத்தின் நோக்கம் அரசியல்-மத சர்ச்சைகளினால் திசை திருப்பப்படாமல், திட்டம் சுமுகமான முறையில் நிறைவேற்றப்பட்டால், தென் மாவட்டங்களின் பொருளாதார மேம்பாட்டுக்கு வழி பிறக்க நல்ல வாய்ப்புள்ளதாகவும் அவர் தெரிவித்தார். இறுதியாக, அடுத்த மாதம் ஜூன் மாதம் பொதுத் தேர்தல் நடைபெறலாம் என்று கணித்த சரத், திமுக அரசு, இலவசத் திட்டங்கள் தவிர்த்து வேறெதையும் தனது சாதனைகளாகக் கூற இயலாத நிலையில் உள்ளதையும் சுட்டிக் காட்டியுள்ளார்!

நன்றி: டெக்கான் குரோனிக்கள்

*** 358 ***